Mag-aradal kita nin Bikol

Ika-duwang Kabtang kan Mag-aradal kita nin Bikol

An pakanood bako sana sa pagdangog aladad siring man sa pagbasa. Alagad saen kita makurua nin babasahon sa Bikol? Mala, makaherak-herak asin nakakasupog na mabibilang mo sana sa muro kan saimong kamot an libro na madudukayan sa National Library, anas pang sa English nakasurat.

An mga dayuhan na nag-aradal kan satung tataramon, nagsasabing an Bikol iyo an saru sa pinakamagayon asin pinakamalinaw na tataramon sa bilog na kinaban, ano ta kulang an mga parasurat nin Bikol? An boot sabihon daing pagmakulog?

Haralangkawon na ngunyan an mga dungo kaya dai na nahihiling na yaon sana sa nga’ngaan an pighahanap. Pag Bikolnon ka, aram mo na pagsinabing pabasa, urog na pag Semana Santa. An Pasion iyo tabi an saru sa mga libro na magagamit niato sa pag-adal kan tataramon na Bikol.

Sarung kangangalasan para sa sako na igwa nin mga tawong natutoom an bilog na nakasurat san Pasion na Bikol, alagad makakangalas man giraray nin huli ta kan hapoton ko kun ano an kahulugan nin sarung katagang dai ko nasasabutan, dai man palan aram. Garu man sana pagdalan nin pelikulang English, nasasabutan niato an estorya alagad dai man niato masayod an pigsasarabi.

Uya an mga nagkapirang kataga na pinaggagamit ngunyan alagad naiiba na an an boot ipagkahulugan. Ipaghapot mo kun ano an boot sabihon kan pintakasi, an simbag fiesta o bulang. Sa sarung kanta sa Sta Cruzan maaraman niato an tunay na kahulugan kaini. “ O Cruz na makawiliwili, O Cruz na samong pintakasi, surugon mo ngani kami, ta ikang namomotan mi.” Susog ki Fr. Marcos Lisboa, an boot sabihon sa English mediator or lawyer. Ano naman an latok? Iyo ini an inaapod niatong lamesa ngunyan.

Padadaguson ini tabi.

Dios Mabalos.