Mag-aradal kita nin Bikol

AN TATARAMON NA BIKOL

Habo ko na kuta nang makisawong-sawong alagad makulog sa herog na pagparabasahon an mga durulak, mga balubagi asin paralangkawan kan ihi manunungod kun papano papagdanayon an tataramon na Bikol. Tara, kun pagsasararoon gabos na pagmawot, boot kan gabos na magdanay ini asin mapaurog an kayaman na ipinagwalat sa satuya kaya ngani namimidbiran kita bilang mga Bikolano.

An tawong mayaman naaaman niya an saiyang nasasaray asin nakakaputan na pirak, kaibanan na an saiyang inutangan, siring man baga sa tataramon na Bikol, kinakaipuhan na aramon niato an mga nasasaray na yaman asin mga ginagamit ta ngunyan, kabali na an mga sinublian bago masabi niato kita mayaman.

Baloon ta daw? Kaya mo daw magbilang poon 1 hanggan 50? An sakong mga hinapot, an aram sana abot sampolo, paghuna ko mayaman an Bikol, ano ta English o Kastila an ginagamit pag abot 11 abot 50? Dai ko minama’wot na na ba’gohon an naaraman nindo, an boot ko sana na madagdagan ini. Gamitan sana nin prefix na kag- an 11 abot 19, kagsaru abot kagsiyam. An 20 - duwam’polo, an 21 -duwang polo may saru. An mga masurunod siring man an gibuhon.

Sa masunod paghuhururonan ta naman an pagbasa.

Dios Mabalos.